ДЕХИДРАТАЦИЈА НА ТЕЛОТО

Веќе е познато дека нашето тело се состои од 60% вода. Водата е насекаде во нашето тело, во ткивата, органите, коските и клетките. Водата е заслужна за регулирање на температурата на нашето тело, како и за останатите телесни функции

Бидејќи нашето тело ја губи водата преку потење, дишење, варење на храната, важно е да се хидрираме со пиење на течности или да јадеме храна која содржи поголем процент на вода. Количината на вода која треба да ја внесеме зависи од поголем број на фактори, вклучувајќи ја климата, физичката активност како и здравствените проблеми. 

Кога практикуваме Аутдор спортови, поради физичката активност губиме поголема количина на вода од нашето тело, како преку потта, така и преку забрзаното дишење. Додека планинариме нашето тело ја користи водата за мускулното движење, како и за одржување на вистинската рамнотежа на PH вредноста. За да се задржи правилната рамнотежа, телото бара поголем внес на течности. Дехидратацијата на телото со сигурност ке ни ја уништи забавата и уживањето при нашите Аутдор активности.

Добрата вест е дека можеме лесно да ја избегнеме дехидратацијата доколку имаме неколку работи на ум:

- Доколку денот ни е испланиран за планинарење, треба при самото станување да испиеме половина литар на вода на празен стомак. Препорачливо е да се испие уште половина литар во следниот час. Во текот на планинарењето константно треба да внесуваме вода, да не чекаме да ни се исуши устата, па тогаш да се напиеме, бидејќи веќе е касно. Кога ке почуствувате замор, застанете, одморете некоја минута, а тоа време искористете го да се напиете вода. Кога ке се вратиме во кампот, треба да испиеме еден литар вода, не наеднаш, туку со паузи, Во текот на планинарењето треба да испиеме од 2 до 3 литри вода, а во текот на целиот ден околу 6 литри.

- Кај некои индивидуи, внесувањето на поголема количина на вода во еден ден, или во пократок период им претставува проблем. Затоа во водата можеме да додадеме прашаци со различни вкусови, кои освен вкус ке додадат минерали и сол.

- Планирањето на количината на вода која ќе ја носиме. Доколку има во текот на планинарењето каде да се наполни пивка вода, не мора да носиме поголемо количество, заради тежината која ја додава. Но доколку нема, препорачуваме две шишенца по 1 литар, или хидро систем кој е попрактичен, бидејќи неговото црево доаѓа до вашите гради, и нема да има потреба да го симнувате вашиот ранец.

- Доколку има сенки на патеката, треба да го избегнуваме сонцето што повеќе можеме. Така нашето тело ке изгуби помала количина на вода.

- Јадете здрава и хранлива храна, избегнувајте газирани пијалоци и алкохол.

Симптоми на дехидратација:
- Жед
- Суви усни, уста и нос
- Главоболка
- Замор
- Длабоко и тешко дишење
- Брз срцев пулс од 100 удари во минута при мирување
- Вртоглавица
- Температурен пад, нарочно во екстремитетите
- Сушење на очите
- Низок крвен притисок
- Плави усни
- Мускулни грчеви
- Болку во бубрезите

Симптомите на дехидратацијата се слични со симптомите на планинска или висинска болест. Затоа е важно да останеме хидрирани, и со тоа да можеме навремено да ја препознаеме висинската болест и да не ја помешаме со дехидратацијата.

За да провериме дали сме хидрирани или не можеме да направиме и неколку тестови:
- Да ја провериме урината. Доколку вашата урина е бистра и светла, или пак со боја на слама, тогаш вашето тело е хидрирано, но доколку бојата на вашата урина е потемна жолта или портокалова, тоа значи дека е концентрирана и дека на вашето тело му фали вода.

- Исто така хидрираноста на телото можеме да ја провериме со нежно штипкање на кожата. Доколку се штипнеме и самата кожа не се врати брзо во својата првобитна состојба, тогаш имаме знак дека ни треба хидрирање на нашето тело.

Доколку не чека некоја појака планинска тура, а не сме навикнати да внесуваме поголема количина на вода, добро е да почнеме со тренинг за внесување на вода. Две недели пред планинарската тура, пополека да го зголемуваме внесеното количевство на вода, се додека не стигнеме 5-6 литри на ден, ни никогаш повеќе од 500-600 мл оддеднаш.

Можете и сами да си направите изотонични пијалоци. Во прилог неколку рецепти:

- Изотонична лимонада:
700 ml вода, 30 g фруктоза или шеќер, 1/4 лажичка сол, 10 ml сок од свежо исцеден лимон.

- Цитрусен изотоник
1,5 dl сок од свежо цеден портокал, 2 големи лажици сок од цеден лимон, 1 лажица цедена лимета, 3/4 лажичка сол, вода до вкупно 2 литра.

- Меден изотоник
100g мед, 1/2 лажичка сол, 1/2dl сок од свежо цеден лимон, вода до вкупно 1л (се препорачува топла, за медот да може да се растопи).

- Изотоник од јаболко
200ml незасладен сок од јаболко, 1l вода, 1/2 лажичка сол, неколку ливчиња свеж босилек.

Како за крај, уживајте во Аутдоор спортовите, природата и чистиот воздух, избегнете ги градските гужви, И НЕ ЗАБОРАВАЈТЕ, ПИЈТЕ ВОДА!